Þórólfur Guðnason, sóttvarnarlæknir, er ekkert sérstaklega ánægður með svonefnda „gluggatónleika“ sem veitinga- og skemmtistaðurinn Prikið stóð fyrir um helgina, í samstarfi við Reykjavíkurborg.

Tónleikarnir um helgina voru liður í verkefninu „Sköpum líf í lokun“ sem er ætlað að glæða miðbæinn lífi með því að aðstoða skapandi fólk með góðar hugmyndir við að nýta tóm rými.

Nú um helgina steig tónlistarmaðurinn Auður á stokk og varð nokkur mannmergð fyrir utan glugga Priksins.

Geoffrey Þ. Huntingdon-Williams, einn eigenda Priksins, hefur sagt að á næstu tónleikum verði betur hugað að sóttvörnum, en verkefnið hafi verið unnið í góðum samskiptum við lögreglu.

Þórólfur efast þó um að samskiptin við lögreglu hafi verið mikil

„Ég held að það geti nú varla verið. Ekki upp á þetta að gera. Þetta er ekki í samræmi við þær reglur og leiðbeiningar sem eru í gangi að mínu mati,“ sagði Þórólfur í samtali við Bítið á Bylgjunni nú í morgun. „Það er ekki nógu gott ef menn eru að safnast svona saman,“ sagði hann enn fremur.

Þórólfur vildi ekki fara út í þá sálma hvort eðillegt væri að verkefni sem þetta væri styrkt af borginni.

Hann taldi ljóst að hópmyndun líkt og sú sem átti sér stað á tónleikunum um helgina væri gróðrarstía fyrir kórónuveiruna.

„Þegar fólk er í svona þéttum hópi þá er það alveg augljóst að það er þar sem veiran hoppar frá manni til manns.“

Það verði svo ekki fyrr en eftir viku sem í ljós komi hvort einhver smit hafi átt sér stað á tónleikunum.