Landsréttur staðfesti í vikunni úrskurð Héraðsdóms Reykjaness um að maður sem grunaður er um smygl á talsverðu magni af ketamíni, heróini, oxycontin og öðrum sterkum verkjalyfjum ásamt öðrum manni, skuli sæta farbanni til 21. febrúar 2021 kl. 16:00.

Mennirnir voru stöðvaðir með stuttu millibili í Leifsstöð. Annar þeirra með 77 grömm af heróini auk talsverðs magns lyfseðilskyldra lyfja, þar á meðal Oxycontin. Hinn maðurinn, sá sem nú hefur verið úrskurðaður í farbann, var svo gripinn með ketamín sem er gríðarlega sterkt deyfilyf og meðal annars notað á hesta.

Í úrskurði héraðsdóms kemur fram að maðurinn eigi annað mál yfir höfði sér í refsikerfinu. Er þar um að ræða meint peningaþvætti og innflutning hans á 276 grömmum af metamfetamíni og annarskonar lyfjum þann 19. júní á þessu ári.

Segir í farbannskröfu lögreglunnar á Suðurnesjum að hún telji hættu á að ákærði reyni að komast úr landi eða með öðrum hætti að komast sér undan málsókn eða fullnustu refsingar.