Nú hafa samtals 23 látist hér á landi af völdum faraldurs SARS-CoV-2 veirunnar sem veldur Covid-19 sjúkdómnum. Af orðum Páls Matthíassonar forstjóra Landspítalans á blaðamannafundi í morgun mátti ráða að fjöldi látinna myndi að minnsta kosti fjölga um einn í dag. Samtals létust fimm síðustu helgi, tveir á laugardaginn og þrír í gær. Samkvæmt tölfræði á síðunni Covid.is má ráða að 5.101 einstaklingur á Íslandi hafi greinst með Covid-19 frá því 28. febrúar 2020. Dánartíðni af völdum sjúkdómsins er því 0.45% á Íslandi í dag.

Þrjár bylgjur hafa nú riðið yfir í faraldrinum. Í þeirri fyrstu létust 10 og eru látnir í þeirri seinni nú orðnir 13. Enginn lést í annarri bylgjunni. 10 af 13 dauðsföllum þriðju bylgjunnar má rekja til hópsmits á Landakoti sem kom upp í október.

Samkvæmt tölum sem DV óskaði eftir hjá Landlækni er meðalaldur látinna frá upphafi faraldursins 81,4 ár, og er þar um að ræða 13 karla og 10 konur.

Í fyrri bylgjunni létust 10 manns, sem fyrr segir, og voru það fjórir karlar og sex konur. Meðalaldur þeirra var 73,5 ár.

Í þriðju bylgjunni sem hefur nú staðið yfir síðan 15. september hafa 13 látist, 9 karlar og 4 konur. Meðalaldur þeirra er 87,8 ár.

Meðalaldur látinna hefur því hækkað umtalsvert frá fyrstu bylgju, eða um 14,3 ár og munar þar vafalaust mest um hópsmitið á Landakoti.