Alls greindust tíu ný smit kórónuveirunnar hér innanlands síðasta sólarhring, sem er heldur lægri tala en við höfum verið að sjá síðustu daga. Þó ber að taka þessum með þeim fyrirvara að í gær var laugardagur og því færri sýni tekin en ella, en Þórólfur Guðnason, sóttvarnarlæknir, hefur ítrekað bent á að þeim tölum sem birtist á sunnudögum og mánudögum verði að taka með þeim fyrirvara að færri sýni voru tekin.
Átta af þessum tíu voru í sóttkví við greiningu.
Fjórtán greindust jákvæðir fyrir kórónuveirunni á landamærunum. Einn með virkt smit, einn með staðfest mótefni og beðið er eftir mótefnamælinu frá hinum tólf.
Nýgengi smita er nú 36,8 og hefur það hækkað undanfarna þrjá daga, en það var 32,5 þann 25. nóvember og hafði ekki verið það lágt síðan um miðjan september.
187 manns eru nú í einangrun og 667 í sóttkví. 42 eru á sjúkrahúsi og tveir á gjörgæslu.
Alls hafa 5.381 einstaklingur greinst með krónuveiruna á Íslandi frá upphafi faraldurs og 44.698 einstaklingar hafa lokið sóttkví.