Þórólfur Guðnason sóttvarnalæknir sagði á upplýsingafundi dagsins að innanlandsmit væru á hraðri niðurleið og þakkaði hann það góðri þátttöku almennings í þeim aðgerðum sem hafa verið í gildi. „Þessi bylgja sem við höfum verið að eiga við undanfarið er komin vel niður,“ sagði Þórólfur.

Þrjú innanlandssmit greindust í gær, þar af voru tveir í sóttkví. Rúmlega 500 sýni voru tekin. 198 eru nú í einangrun og 220 í sóttkví. 45 eru á sjúkrahúsi vegn COVID-19, þar af tveir á gjörgæslu.

Þórólfur sagði mikilvægt að fylgjast vel með þeim sem greinast á landamærum og tryggja að þeir fari í einangrun. Litlar hópsýkingar hafi komið upp í kringum slíka aðila.

Núverandi samkomutakmarkanir gilda til og með 1. desember. Þórólfur sendir tillögur til heilbrigðisráðherra um fyrirkomulag áframhaldandi takmarkana og munu þær takmarkanir verða í gildi út árið. Þá verða í vikunni gefnar út sérstakar leiðbeiningar varðandi veisluhöld.

Vinna er hafin við undirbúning á bólusetningu. Þórólfur minnti á að þar sé ekkert í hendi, við vitum ekki hvenær bóluefni verður afhent né hvað við fáum mikið af því. En mikilvægt sé að vera tilbúin þegar bóluefnið kemur.