Andrés Ingi Jónsson, þingmaður utan flokka, leggur til að hámarkshraði í þéttbýli verði lækkaður niður í 30 kílómetra hraða á klukkustund. Andrés sendi frumvarpið á þingmenn í dag með því markmiði að fá meðmælendur.
Rætt var við Andrés um frumvarpið í kvöldfréttum Stöðvar 2 í kvöld. Þar sagði Andrés meðal annars að sveitarfélög gætu ákveðið að hafa hærri hraða en 30 kílómetra á klukkustund ef aðstæður leyfa.
Verði frumvarpið samþykkt mun ákvörðun um hámarkshraða vera færð frá Vegagerðinni og í hendur sveitarafélaga. Andrés vill meina að það sé betra og bendir á umræðu um ökuhraða á Hringbraut.
„Reykjavíkurborg þurfti að togast svolítið á við Vegagerðina þegar íbúar kölluðu eftir lækkun á hámarkshraða. Ef þetta frumvarp væri orðið að lögum væri sönnunarbyrðin öfug og það þyrfti alltaf að miða hraðabreytingar út frá öryggi vegfarenda og sérstaklega þeirra viðkvæmustu; gangandi vegfarernda,“ sagði Andrés í samtali við fréttastofu Stöðvar 2.
Andrés bendir á að þessar breytingar snúist bæði um öryggi og umhverfið. Þá nefnir hann að þróunin á þessum málum erlendis sé í svipuðum dúr. „Bara á þessu ári hefur til dæmis verið ákveðið bæði á Spáni og í Hollandi að lækka hraða niður í 30 km/klst eins og ég er að leggja til.“