Maður sem samkvæmt heimildum DV er íbúi í húsnæði að Friggjarbrunni í Úlfarsárdal sem varð eldsvoða að bráð í vikunni hefur tekið upp óhugnanlegt myndband þar sem hann hótar manni í símtali morði. Hann sveiflar haglabyssu fyrir framan símann og segir meðal annas: „Þá mæti ég með þetta. Ég mun mæta heim til þín með þetta.“
Eins og kom fram í fréttum í gærkvöld er í dreifingu myndband sem sýnir mann sem virðist henda bensínsprengju inn um glugga íbúðar í fjölbýlishúsi við Friggjarbrunn. Íbúðin skemmdist mikið í eldsvoða á þriðjudagskvöld og segir lögregla að grunur sé um íkveikju.
Íbúi þar er virkur keppandi í bardagaíþróttinni MMA. Hann birti um helgina myndband sem sýnir hann ganga í skrokk á manni. Í kjölfar birtingar myndbandsins handtók lögregla manninn og yfirheyrði á sunnudag.
Þegar líður á myndbandið verður maðurinn mjög reiður, bölvar viðmælanda sínum í sand og ösku og hótar honum lífláti.
Myndbandið sem sýnir morðhótunina má sjá hér að neðan. Átt hefur verið við myndbandið til að leyna auðkenni mannsins.