Héraðsdómur Reykjavíkur dæmdi í morgun mann í átta mánaða skilorðsbundið fangelsi fyrir brot gegn valdstjórninni. DV sagði frá ákærunni.
Brotin sem um ræðir áttu sér stað aðfaranótt 2. desember fyrir tveim árum. Maðurinn, sem þegar sætti handtöku og sat í lögreglubíl, réðst á lögreglumann sem með honum sat í bílnum. Tókst manninum að sparka í lögreglumann með þeim afleiðingum að lögreglumaðurinn hlaut heilahristing, mar á augnloki og augnsvæði og yfirborðsáverka á höfði.
Er á lögreglustöðina var komið hafði maðurinn í hótunum við fjóra lögreglumenn sem á vakt voru og hótaði ítrekað að lemja þá, konur þeirra og börn.
Maðurinn hlaut árið 2017 10 mánaða fangelsisdóm fyrir hótanir um líkamsmeiðingar og brot á barnaverndarlögum, vopnalögum og umferðarlögum. Var dómurinn því dæmdur upp og ákærða gerð refsing í einu lagi. Var það virt ákærða til refsilækkunar að hann hafi játað brot sín hreinskilnislega. Þá var tekið tillit til þess að langur tími væri liðin frá brotunum, og eru hagir mannsins breyttir frá því sem var er hann framdi brotin.
Til viðbótar við átta mánaða skilorðsbundna dóminn er manninum gert að greiða málskostnað, 42 þúsund krónur og laun lögmanns síns, um 230 þúsund krónur.