Svandís Svavarsdóttir, heilbrigðisráðherra, vill ekki tjá sig um hópsýkingu COVID-19 sem upp kom á Landakoti  og sagði málið enn fremur ekki inn á sínu borði. Þetta kemur fram í frétt Stundarinnar, en blaðamenn Stundarinnar leituðu ítrekað til heilbrigðisráðherra eftir svörum enda um að ræða alvarlegast atvik sem upp hefur komið í íslenskri heilbrigðisþjónustu.

Tólf einstaklingar eru látnir í kjölfar hópsýkingarinnar. Lögum samkvæmt er Svandís Svavarsdóttir, vegna stöðu sinnar sem heilbrigðisráðherra, höfuð heilbrigðismála í landinu. Hún skipar forstjóra heilbrigðisstofnana, þar á meðal forstjóra Landspítala sem Landakot heyrir undir. Eins skipar hún landlækni.

Samkvæmt frétt Stundarinnar hafa starfsmenn spítalans, smitsjúkdómalæknar og sýkingavarnardeild Landspítala ítrekað bent á að spítalinn sé ófullnægjandi til að takast á við faraldur á borð við COVID-19 meðal annars vegna ófullnægjandi húsnæðis, þar með talið húsnæði Landakots.

Eins var ekki hægt að skipta Landakoti niður í sóttvarnarhólf sökum ófullnægjandi mönnunar.

Bæði Þórólfur og Alma tóku undir það í samtali við Stundina að hópsýkingin á Landakoti sé með alvarlegri atburðum sem átt hafa sér stað undanfarna áratugi á Landspítala.

Því vekur nokkra furðu að málið sé ekki á borði þess aðila sem lögum samkvæmt fer með yfirstjórn málaflokksins og eins að heilbrigðisráðherra neiti að tjá sig um atvikið.

Niðurstöður úttektar Landspítalans á hópsýkingunni verða kynntar síðar í dag á blaðamannafundi klukkan 15:00 í dag. 

UPPFÆRT: 

Athugið – Í nýrri frétt kemur fram að heilbrigðisráðherra telur sér ekki fært að ræða málið fyrr en landlæknir hefur lokið rannsókn á atburðarásinni. Hún fylgist þó vel með málinu.

Sjá nánar: Svandís fylgist með Landakotsmálinu en getur ekki tjáð sig á þessu stigi