Samkvæmt tölum sem DV óskaði eftir frá embætti Landlæknis og almannavörnum hafa samanlagt 74.687 manns farið í sóttkví á Íslandi frá upphafi faraldurs.
Skiptast þær tölur þannig að 22.880 fóru í sóttkví frá upphafi faraldurs í byrjun mars til 14. sept. Þann 14. september breyttu sóttvarnayfirvöld reglum um sóttkví þannig að boðið var að stytta sóttkví gegn seinni sýnatöku. Eftir 14. september hafa 19.682 farið í sóttkví og má gera ráð fyrir að langflestir, ef ekki allir, hafi þegið valkostinn að stytta sóttkví sína um viku gegn seinni sýnatöku.
Þar að auki hafa 32.125 komið til landsins frá 19. ágúst og farið í svokallaða skimunarsóttkví, sem er sóttkví á milli tveggja sýnataka. Á milli sýnatakanna þurfa að líða 4-5 dagar, og er niðurstöðu yfirleitt að vænta samdægurs er seinni sýnatakan fer fram snemma dags, annars næsta dag. Þannig verður dvölin í sóttkví aldrei stytti en 5 dagar.
Ef fjöldi einstaklinga í sóttkví er margfaldaður með dagafjölda sem þeir voru sendir í sóttkví fæst út að Íslendingar hafa eytt 618.719 dögum í sóttkví. Það jafngildir tæplega 17 öldum. Til samhengis má líta á neðangreinda töflu:
618.719 dagar eru:
88.388 vikur
20.624 mánuðir
1.695 ár
Til samanburðar má nefna að 1.146 ár eru liðin frá landnámi, 1.090 frá stofnun Alþingis, 1.021 frá kristnitöku og 211 frá valdtöku Jörunds Hundadagakonungs.
Hér skal þó tekið fram að sá háttur er hafður á hjá smitrakningateymi almannavarna, að byrja að telja dagana í sóttkví frá því einstaklingurinn var útsettur fyrir smiti. Ef sett er upp dæmi mætti þannig segja að ef Jón hittir Pétur á mánudegi, og Pétur greinist svo með jákvætt Covid-19 smit á miðvikudegi, þá reiknast sóttkví Jóns frá mánudeginum. Því er ekki alltaf svo að einstaklingar fara í fulla sóttkví.
Fyrir helgi sagði DV frá því að mál væru til skoðunar er varða lögmæti hinnar svokölluðu skimunarsóttkví. Umboðsmaður Alþingis birti svo tilkynningu á vef sínum á mánudaginn þar sem hann sagði lagaheimildir sóttvarnayfirvalda óskýrar, kallaði eftir breytingu á þeim og að kæruleiðir yrðu skýrðar.
