Kolbrún Bergþórsdóttir, blaðamaður á Fréttablaðinu, segir nauðsynlegt að fara ofan í saumana á sóttvarnaaðgerðum vegna COVID-19 og kanna hvort þær hafi verið of harðar. Þetta kemur fram í leiðara blaðsins í dag.
„Sóttvarnayfirvöld og ríkisstjórn geta ekki horft fram hjá því að aðgerðir sem gripið hefur verið til hafa valdið margvíslegum skaða. Þau verða að þola gagnrýni og ættu reyndar að taka henni vel en hlaupa ekki sjálfkrafa í vörn. Þau ættu einmitt að spyrja sig hvort það geti verið að aðgerðir séu of harkalegar og vera opin fyrir sjónarmiðum sem falla ekki alls kostar að þeirra eigin skoðunum. Þríeykið er ekki heilagt og óskeikult og svo sannarlega er ríkisstjórnin það ekki heldur,“ segir Kolbrún.
Kolbrún bendir á að virtir sérfræðingar og læknar víða um heim vari við hörðum aðgerðum og segi að lækningin sé orðin verri en sjúkdómurinn. „Skoðanir þessa hóps eiga ekki greiða leið að fjölmiðlum og sá sem vekur athygli á þeim í skoðanagrein og tekur undir þær er umsvifalaust stimplaður sem trumpisti og gefið er í skyn eða sagt beinum orðum að hann vilji bara að fólk deyi. Enginn vill að fólk deyi, enginn vill heldur að fjöldaatvinnuleysi skapist, fólk verði gjaldþrota eða þurfi að lifa við stöðugan ótta. Það er engin ástæða til að fullkominn einhugur sé um aðgerðir við COVID. Rökræður verða að fara fram og ólík sjónarmið eiga að heyrast,“ segir Kolbrún.
Kolbrún segir ljóst að aðgerðirnar gegn COVID-19 hér á landi bitni mjög illa á fjölmörgum. Hins vegar séu engar umræður um þær á Alþingi. Fæstir þingmenn standi í lappirnar þegar kemur að þessu málefni. Ánægjuleg undanteknin sé Sigríður Á. Andersen.