Samkvæmt heimildum DV hyggst Samhjól, félag hjólhýsaeigenda, gera Bláskógabyggð tilboð um að hjólhýsaeigendur taki að sér nauðsynlegar framkvæmdir til þess að tryggja áframhaldandi starfsemi hjólhýsasvæðisins á Laugarvatni.
Fulltrúar samtakanna áttu fund með Ástu Bjarnadóttur, sveitarstjóra Bláskógabyggðar, í dag þar sem tilboðið var meðal annars til umræðu. Að sögn heimildarmanns tók Ásta vel í tilboð Samhjólsmanna. Samkvæmt heimildum DV snýr tilboðið að því að hjólhýsafólkið á Laugavatni fjármagni þær breytingar sem þurfa að ráðast í svo svæðið uppfylli skilyrði slökkviliðs og brunavarna. Málið verður tekið fyrir á sveitarstjórnarfundi 14. október næstkomandi.
Í september var afráðið að loka hjólhýsasvæðinu á Laugarvatni sem hefur staðið þar í 50 ár. Var þar litið til umsagna Brunavarna Árnessýslu og Húsnæðis- og mannvirkjastofnunar. Voru álitin svo að segja samdóma um að byggðin uppfyllti ekki skilyrði brunavarna. HMS gekk öllu lengra og sagði að hjólhýsabyggð almennt væri ekki lögleg. Þegar hjólhýsi væru notuð sem íverustaður til lengri tíma en fjögurra mánaða giltu um það sömu reglur og um t.d. vinnubúðir eða gámabyggðir. Langfæst hjólhýsi uppfylli þær kröfur sem þar eru gerðar, enda eru húsin að mestu leyti úr eldfimum efnum. Þá benti slökkviliðið á að minna en fjórir metrar væru á milli mannvirkja á svæðinu og að birkiskógurinn sem byggði stendur í einn sá stærsti og þéttasti á landinu.
Þannig er ljóst að brunavarnir á þessu tiltekna svæði eru aðeins einn vinkill í málinu og ljóst að tillögur Samhjóls snúi aðeins að þeim vinkil. Eftir stendur að ef álit HMS reynist rétt og að bygginga- og brunavarnareglugerðir eigi við um hjólhýsin þá sé lítið sem Bláskógabyggð getur gert, enda HMS ekki undir sveitarstjórn þess sveitarfélags komið.
Félagsmenn Samhjóls sem DV ræddi við í dag sögðust bjartsýn. Þetta væri einfaldlega tilboð sem Bláskógabyggð gæti ekki hafnað. Þá hafa aðrir viðmælendur DV sem ekki vildu láta nafn síns getið spurt hvers vegna sveitarfélagið hafi ekki sinnt þessum málum sjálft, enda lögbundið hlutverk sveitarfélags að sjá um lagningu nauðsynlegra lagna fyrir brunahana og sjá um að skipulag svæða sé með þeim hætti að ekki starfsemi stangist ekki á við lög og reglur um, til dæmis, brunavarnir.
