Gunnar Smári Egilsson, fjölmiðlamaður og sósíalisti, birti í fyrrinótt sláandi tölfræði um Corona-veiruna alræmdu. Hann bendir á að ef smit ferðist línulega, sem flest bendir til að sé tilfellið, þá sé mannkynið í vondum málum.
„Fyrir viku voru 547 skráðir veikir af Wuhan-vírusnum í Kína. Nú eru þau orðin 6100. Þetta er rúmlega 1000% fjölgun. Það má búast við að fjöldinn verði orðinn 68 þúsund í næstu viku og 760 þúsund í þar næstu viku og 8,5 milljónir í vikunni þar á eftir. Með sömu hröðun tekur það ekki nema fram í byrjun mars að allir jarðarbúar verði orðnir veikir,“ segir Gunnar Smári. Rétt er að taka fram að nú á föstudegi, þegar þetta er skrifað, eru tæplega 10 þúsund manns sýktir.
Hann segir að væri ef til vill ekki slæm hugmynd að loka landinu. „Það er því ekki að undra að einhver hafi stungið upp á að landinu væri lokað, þ.e. Íslandi, ekki Kína. Á aðeins fjórum dögum hefur skráðum dauðsföllum fjölgað úr 26 í 169. Það er enn meiri hröðun, ef hún heldur áfram verð allir jarðarbúar dánir 7. mars. En hvað veit ég, kannski ferðast svona smit ekki línulega, kannski er ekkert að óttast. Góða nótt,“ segir Gunnar Smári.
Einn félagi hans skrifar athugasemd og segir: „Það sofnar enginn eftir þennan lestur!“. Þá bætir Gunnar við fyrri færslu og segir: „Fyrsti sjúklingurinn var greindur um miðjan desember, en þá höfðu margir verið smitaðir og smitað aðra frá því undir lok nóvember, að því talið er. Ef fyrsti Íslendingurinn greinist á morgun, og ef pestin ferðast líkt og í Kína, getum við búist við að um 6100 manns verði orðnir veikir um miðjan mars. Bráðadeildin okkar ræður hins vegar ekki við miðlungs-rútuslys. Þið getið því ímyndað ykkur ástandið þar og á Landspítalanum strax eftir örfáa daga. Kínversk yfirvöld eru að byggja upp spítala við Wuhan, eftir einhverri neyðaráætlun, spítala sem tekur aðeins 2-3 vikur að reisa. Þeir voru byrjaðir á tveimur slíkum í gær og eru með miklu fleiri í undirbúningi. En kannski er ekkert að óttast. Góða nótt, aftur.“
Að lokum segir hann svo: „Það má draga þetta saman í: Ekki borga inn á sumarleyfisferðina.“