Lögreglan á höfuðborgarsvæðinu fékk tilkynningu um líkamsárás og tilraun til ráns í Kópavogi klukkan rétt rúmlega 22 í gærkvöldi. Að sögn lögreglu höfðu þrír ungir menn ráðist á annan mann og krafið hann um peninga.
Í skeyti frá lögreglu segir að sá sem fyrir árásinni varð hafi komist frá árásarmönnunum til félaga síns. Málið er í rannsókn. Ekki kemur fram hvort sá sem fyrir árásinni varð hafi orðið fyrir meiðslum.
Gærkvöldið og nóttin voru að öðru leyti tiltölulega róleg í umdæmi lögreglunnar á höfuðborgarsvæðinu. Þrír ökumenn voru þó stöðvaðir vegna gruns um akstur undir áhrifum áfengis eða fíkniefna.
