Á undanförnum vikum hefur fyrirtækið Hrjáf ehf., sem Róberts Wessman í Alvogen á, keypt rúmlega þrjátíu nýjar íbúðir í Reykjavík fyrir rúmlega 1,8 milljarða. Flestar íbúðanna eru í nýja hverfinu við hús Ríkisútvarpsins. Athygli vekur að Hrjáf ehf. greiddi hluta af kaupverðinu í Efstaleiti með 317 fermetra þakíbúð Róberts við Vatnsstíg 20-22. Var hún metin á 460 milljónir króna í viðskiptunum.

Fréttablaðið skýrir frá þessu í dag. Fram kemur að kaupverð íbúðana í Efstaleiti hafi verið 1.510 milljónir króna. Eins og fyrr segir voru 460 milljónir greiddar með íbúðinni við Vatnsstíg en afgangurinn var fjármagnaður með lánsfé og var einu skuldabréfi þinglýst á hverja íbúð.

Í lok nóvember keypti Hrjáf ehf. sex íbúðir við Frakkastíg og Hverfisgötu fyrir 308 milljónir en fyrir átti fyrirtækið 15 íbúðir við Frakkastíg. Í desemberbyrjun keypti Hrjáf ehf. 31 íbúð á svokölluðum A-reit á lóð RÚV í Efstaleiti. Íbúðirnar eru við Lágaleiti, Efstaleiti og Jaðarleiti og eru af ýmsum stærðum.