Vinnuslys varð í vikunni um borð í bát þegar verið var að lagfæra leguhringi. Sá sem að því vann missti slípirokk með þeim afleiðingum að hann fékk djúpan skurð í fingur. Hann var fluttur í fyrstu höfn, sem var Keflavíkurhöfn. Þar biðu hans sjúkraflutningamenn sem hlúðu að honum og fluttu hann síðan á Heilbrigðisstofnun Suðurnesja.
Þetta kemur fram í dagbók Lögreglunnar á Suðurnesjum og einnig þetta:
Lögreglan á Suðurnesjum handtók í fyrradag ökumann sem ók Reykjanesbraut með annan bíl í dráttartaug, vegna gruns um að hann æki undir áhrifum fíkniefna. Sýnatökur á lögreglustöð sýndu jákvæðar niðurstöður á neyslu amfetamíns.
Þá voru í vikunni höfð afskipti af tveimur ökumönnum til viðbótar vegna gruns um akstur undir áhrifum fíkniefna og reyndist annað þeirra vera sviptur ökuréttindum.