Ökumenn tveggja bifreiða voru fluttir með sjúkrabifreið á Heilbrigðisstofnun Suðurnesja í gær eftir árekstur á Garðvegi. Í skeyti frá lögreglunni á Suðurnesjum kemur fram að ökumennirnir hafi báðir fundið til talsverðra eymsla eftir slysið. Dráttarbifreið þurfti til að fjarlægja bifreiðirnar af vettvangi.
Þá missti ökumaður bifreið sína út af Reykjanesbraut, við Kúagerði, þegar hann ók í snjókrapa á veginum. Endaði bifreiðin um 20 metra frá veginum og var hún óökufær eftir útafaksturinn. Ökumaðurinn fann til eymsla og leitaði sjálfur á Heilbrigðisstofnun Suðurnesja.
Í morgun var svo bifreið ekið aftan á aðra á Hringbraut í Keflavík. Sá sem ók aftan á var ekki orðinn 18 ára og hafði lögreglan á Suðurnesjum því samband við forráðamann hans.