Karlmaður og kona sem fundust látin á Sólheimasandi í gær voru kínverskir námsmenn búsettir í Bretlandi. Þetta kemur fram í frétt Vísis. Konan var 20 ára en karlinn 22 ára.
Þar segir enn fremur að aðstandendur þeirra hafi verið látnir vita og munu þeir vera á leið til landsins. Parið fannst skammt frá flugvélarflakinu á Sólheimasandi en um er að ræða vinsælan viðkomustað ferðamanna. Konan fannst fyrst og skömmu síðar fannst lík mannsins um 150 metrum frá.
Ekki hafði verið tilkynnt að fólksins væri saknað og hefur Vísir eftir Oddi Árnasyni, yfirlögregluþjóni í rannsóknardeild lögreglunnar á Suðurlandi, að rannsókn sé í gangi. Svo virðist vera sem fólkið hafi ofkælst og orðið úti en ekki sé hægt að fullyrða neitt fyrr en niðurstaða krufningar fæst.