Lík karls og konu fundust á Sólheimasandi í dag. Lík konunnar fannst laust undir hádegi en lík mannsins fannst um tvöleytið. Talið er að líkin séu af pari sem var að ferðast saman.
Tilkynning lögreglunnar á Suðurlandi um málið er eftirfarandi:
„Kl. 11:55 í morgun fékk lögreglan á Suðurlandi tilkynningu um að lík konu hafi fundist á Sólheimasandi, skammt frá göngustíg að flugvélarflaki þar. Lögreglumenn fóru þegar á vettvang og í framhaldi af skoðun þeirra á vettvangi var kölluð björgunarsveit til frekari leitar. Um kl. 14:00 fannst lík karlmanns skammt frá þeim stað sem konan lá. Dánarorsök liggur ekki fyrir og verður ekki ljós fyrr en að lokinni krufningu á líkunum. Vísbendingar eru um að um sé að ræða par sem var að ferðast saman og hefur sendiráð viðkomandi ríkis verið upplýst um stöðuna. Bíll sem talinn er í leigu parsins er á bílastæði við Sólheimasand og vitað er að hann fór um Hvolsvöll á austurleið kl. 14:55 þann 13. janúar s.l.
Tæknideildar- og rannsóknarlögreglumenn eru við vinnu á vettvangi og er ekki að vænta upplýsinga af hálfu lögreglunnar að sinni.“
Samkvæmt frétt á RÚV er talið líklegt að fólkið hafi orðið úti. Samkvæmt heimildum fréttastofu RÚV er ekkert sem bendir til saknæms athæfis.