Það er óhætt að segja að árshátíð starfsmanna Arion-banka sé í dýrari kantinum en Fréttablaðið birtir mynd af dagskrá veislunnar. Samkvæmið fer fram í Hörpunni um helgina og líkist dagskráin helst tónlistarhátíð frekar en árshátíð vinnustaðar.
Margir þekktustu tónlistarmenn Íslands stíga á stokk og er því engum blöðum um að fletta að veislan sé rándýr. Í september síðastliðnum rak bankinn um hundrað manns í sparnaðarskyni. Bankinn leigir stóran hluta Hörpunnar undir veisluhöldin og er með þrískipta dagskrá samtímis.
Dagskrána má sjá í heild sinni hér að neðan en til marks um íburðinn má nefna sem dæmi að klukkan 22:30 geta starfsmenn valið á milli þess að hlusta á Röggu Gísla eða JóaPé og Króla. Nú, eða hlusta á uppistand með Meistara Jakob á Kolabrautinni.
Auk fyrrnefndra skemmtikrafta þá leikur GusGus fyrir dansi og Ari Eldjárn fer með gamanmál. Ljóst er að þetta er ekki með ódýrari skemmtunum sem hægt er að bóka á árshátíð.
Viðskiptablaðið fjallaði fyrst um árshátíðina en í samtali við blaðið réttlætti Haraldur Guðni Eiðsson, upplýsingafulltrúi bankans, árshátíðina með því að þetta væri stór vinnustaður.
Benedikt Gíslason var ráðinn bankastjóri Arion síðasta sumar. Þegar hundrað manns voru reknir í september sagði hann: „Til þess að vera samkeppnishæf í okkar rekstri verðum við auðvitað að haga seglum eftir vindum á hverjum tíma.“
