Bernie Sanders, forsetaframbjóðandi og öldungadeildarþingmaður í Bandaríkjunum, er þessa dagana í kosningabaráttu fyrir prófkjör Demókrata fyrir forsetakosningarnar í Bandaríkjunum á næsta ári. Bernie greindi frá því á Twitter-síðu sinni í dag að hann vildi að Bandaríkin væru meira eins og Ísland þegar kemur að skotvopnanotkun lögreglu.

Bernie deilir lista með sex löndum og hversu margir létust í kjölfar þess að lögreglan skaut þá á árinu 2018. Það ætti ekki að koma mörgum á óvart að Ísland trónir á toppi listans. Á árinu 2018 lést enginn af völdum lögreglu hér á landi en á sama tíma létust tæplega þúsund manns í Bandaríkjunum vegna þessa.

„Ímyndið ykkur: Walter Scott – og svo miklu fleiri – væru á lífi í dag ef við værum búin að gera þær meiriháttar breytingar á réttarkerfinu sem við þurfum að gera í þessu landi,“ segir Bernie fyrir neðan listann. Það má gera ráð fyrir því að Bernie vilji að Bandaríkin líkist Íslandi í þessum málum þar sem hann setur Ísland á topp listans.

Fatal shootings by police in 2018:

🇮🇸-0
🇫🇮-3
🇸🇪-6
🇫🇷-26
🇨🇦-36
🇺🇸-992

Imagine: Walter Scott—and so many others—would be alive today if we had the major criminal justice reform we need in this country.

— Bernie Sanders (@SenSanders) January 13, 2020

Bernie hefur gengið vel í kosningakönnunum en hann nálgast fyrsta sætið óðfluga. Um þessar mundir situr Joe Biden í efsta sæti í skoðanakönnunum en hann er hvað þekktastur fyrir að hafa verið varaforseti Bandaríkjanna þegar Obama var forseti. Velgengni Bernie hefur verið mikil undanfarið og má rekja það helst til sósíalískra stefnumála hans.