Þrjátíu og fjögurra ára gamall maður, Andri Vilhelm Guðmundsson, hefur verið verið sakfelldur fyrir Héraðsdómi Reykjavíkur fyrir fimm afbrot, þar af er eitt þjófnaður á köfunarbúnaði úr bíl, sem í ákæru er sagður vera 1.000 evra virði, sem er andvirði um 165.000 íslenskra króna. Önnur afbrot eru umferðarlagabrot og varsla fíkniefna, auk brota á vopnalögum, fyrir að hafa borið dúkahníf á almannafæri.
Andra er dæmdur hegningarauki vegna þess að með þessum brotum rauf hann lögreglusátt sem hann gerði árið 2019 vegna annarra brota. Andri á langan brotaferil að baki, meðal annars fyrir mjög alvarlegar líkamsárásir.
Sumarið 2019 þyngdi Landsréttur dóm yfir honum og dæmdi hann í tveggja og hálfs árs fangelsi fyrir hrottafulla líkamsárás sem var framin árið 2016. Var árásin tilefnislaus en hann réðst á mann á skemmtistað og sló hann þungu hnefahöggi í andlitið sem varð til þess að þrjár tennur brotnuðu í munni hans. Hlaut maðurinn einnig áverka í andliti.
Árið 2011 var Andri dæmdur í þriggja og hálfs árs fangelsi fyrir stórfellda líkamsárás sem framin var á nýársmorgun. Veittist Andri að manni við Hótel 1919 í Hafnarstræti í Reykjavík, sparkaði í hann svo hann féll í gangstéttina og sparkaði ítrekað í höfuð mannsins. Afleiðingarnar urðu þær að þolandinn höfuðkúpubrotnaði og var í lífshættu.
Fyrir afbrotin sem Andri var núna sakfelldur fyrir var hann dæmdur í fjögurra mánaða fangelsi og sviptur ökuréttindum ævilangt.