Lýðheilsustofnun Noregs, Folkehelseinstituttet, hefur mælt með því að fimm ný lönd verði rauðmerkt vegna hættu á kórónuveirusmiti. Þessi lönd eru Ísland, Malta, Pólland, Kýpur og Holland.

Ástæðan er vaxandi smit í þessum löndum en hlutfall smitaðra á hverja 100.000 íbúa hefur verið hátt hér á landi síðustu vikur þó að það nýsmit sveiflist töluvert frá degi til dags. Viðmið Lýðheilsustofnunarinnar eru þau að virk smit séu undir 20 á hverja 100.000 íbúa. Ísland er yfir því hlutfalli.

Stofnunin sendi í kvöld tilkynningu um þetta á norska fjölmiðla og er meðal annars fjallað um málið á vef norska ríkistútvarpsins. Mælir hún með þessu við norsku ríkisstjórnina sem tekur lokaákvörðun í málinu. Ef Ísland fer á rauða listann þýðir það að Íslendingar sem ferðast til Noregs þurfa að fara í sóttkví við komu til landsins.