Á meðan flest lönd keppast um að opna dyrnar fyrir skærustu vonarstjörnur akademíunnar, tilkynnti ríkisstjórn Donalds Trumps bandaríkjaforseta að hún ætli nú að takmarka enn frekar aðgengi erlendra nemenda að háskólum Bandaríkjanna. Þeir nemendur sem eru með vegabréfsáritun til þess að stunda nám í Bandaríkjunum en eru í fjarnámi, þurfa nú að fara heim til sín. Þetta kemur fram í tilkynningu bandaríska útlendingaeftirlitsins.
Samkvæmt tilkynningunni er ætlunin að ganga enn lengra en gert hefur verið hingað til því þeim nemendum sem eru ekki í virku námi í dagskóla verður hreinlega sparkað út. Þeir sem færa sig undir eins í skóla þar sem kennsla er kennd á hefðbundinn hátt, í kennslustofu maður á mann, munu fá að vera í landinu áfram. Munu þessar aðgerðir eiga við um nemendur með F-1 eða M-1 vegabréfsáritanir.
Ákvörðunin þykir sérstaklega harðneskjuleg í ljósi þess að margar deildir bandarískra háskóla hafa nú skipt yfir í fjarnámskennslu í ljósi kórónuveirufaraldursins, sem enn er í fullum gangi í Bandaríkjunum. Eru mörg héröð, sýslur og ríki fyrst núna að grípa til lokana og samkomubanns. Harvard tilkynnti til að mynda í vikunni að allar kennslustundir í grunnnámsdeildum sínum yrðu haldnar í gegnum fjarfundabúnað eða með upptöku, þ.e. með fjarkennslufyrirkomulagi.
Forbes segir frá því að ríkisháskóli Kaliforníu, California State University, stærsti fjögurra ára grunnáms háskóli í Bandaríkjunum með um hálfa milljón nemenda, tilkynnti í maí að allar deildir utan þeirra sem þyrftu á verklegri kennslu að halda yrðu kennd með fjarkennslu. Óljóst er hversu margir nemendur þar þurfa frá að hverfa vegna nýja fyrirkomulags útlendingaeftirlitsins en ljóst er að einhverjir muni falla undir þessi nýju skilyrði útlendingaeftirlitsins bandaríska.