Þórólfur Guðnason, sóttvarnarlæknir, segir allt útlit fyrir að hugsa landamæraeftirlit vegna COVID-19 faraldursins upp á nýtt eftir að Kári Stefánsson tilkynnti að íslensk erfðagreining væri hætt aðkomu sinni að skimunum. Þetta kemur fram í samtali Þórólfs við mbl.is.
Sjá einnig: Íslensk erfðagreining hættir skimun – Kári sakar Katrínu og Svandísi um virðingarleysi
„Þetta setur strik í reikninginn. Klárlega. Það lítur allt út fyrir það að við þurfum að hugsa þetta upp á nýtt,“ sagði Þórólfur. Sem sagðist að öðru leyti lítið geta tjáð sig þar sem tilkynning Kára væri nýtilkomin.
Hann tekur þó fram að það sé ljóst að veirufræðideild Landspítalans geti ekki fyllt upp í skarð íslenskrar erfðagreiningar eins og staðan er núna.
„Hún getur ekki sinnt eins mörgum sýnum og Íslensk erfðagreining hefur gert fram að þessu. Íslensk erfðagreining hefur náttúrulega staðið sig gríðarlega vel og við stöndum í mikilli þakkarskuld við þau.“