Anna Kristjánsdóttir hefur nú búið á Tenerife í 325 daga, og þetta því fyrsta sumarið hennar úti. Hún hefur haldið fylgjendum sínum á Facebook upplýstum um lífið á Tenerife en nú vill svo til að hún fór heldur geyst í sólböðin. Þrátt fyrir það tekst henni alltaf að halda í góða skapið og sjá kómískar hliðar á málunum.

„Eftir að hafa séð til brúnu konunnar og eiginmanns hennar á Næstabar og séð árangurinn vitandi það að þau búa í næstu íbúð við mig, ákvað ég að skella mér á bekkinn og gerði það á sunnudagsmorguninn. Um leið og ég var búin að setja inn pistilinn minn, bar ég á mig sólarvörn og fór svo á sólbekkinn og lá þar eins og skata til hádegis. Það hefði ég ekki átt að gera,“ segir Anna í nýjustu færslunni. 

Henni tekst þó alltaf að sjá kómíkina í erli dagsins, meira að segja þegar hún er sólbrunnin. „Núna lít ég út eins og Íslendingur nýkominn norðan úr höfum sem byrjar á því að fá sér nokkra bjóra og sofnar svo á sólbekknum um leið og komið er til Paradísar. Var ég þó bláedrú á sunnudagsmorguninn,“ segir Anna.

Færsla hennar fylgir hér með þar sem sólbruninn sést vel.