Lögreglan á Suðurnesjum stöðvaði í nótt 15 ára dreng sem var á rúntinum með tveimur félögum sínum. Lögregla ræddi við foreldra drengjanna og var málið tilkynnt til barnaverndarnefndar. Þetta kemur fram í tilkynningu frá lögreglu. Þar segir enn fremur að margir ökumenn hafi verið staðnir að hraðakstri í umdæminu á síðustu dögum.
„Sá sem hraðast ók mældist á 139 km hraða þar sem hámarkshraði er 90 km á klukkustund. Hann var jafnframt grunaður um ölvunarakstur og var því handtekinn og færður á lögreglustöð.“
Einnig voru höfð afskipti af níu ökumönnum sem óku á negldum dekkjum og reyndust tveir þeirra ekki hafa ökuréttindi. Eins voru höfð afskipti af ökumanni sem var með tvö börn í aftursæti bifreiðar sinnar, annað í barnabílstól en hvorugt barnanna í öryggisbelti.