Gyða Dröfn Laagaili Hannesdóttir vissi ekki af réttarhöldum þar sem hún var dæmd til sektargreiðslu vegna 27 ummæla um barnabókahöfundinn og útgefandann Hugin Þór Grétarsson. Dómur féll í málinu þann 12. maí og segist Gyða fyrst hafa fengið vitneskju um dóminn eftir að frétt birtist um hann á dv.is á laugardag. Eftir birtingu fréttarinnar hefur svívirðingum og hótunum rignt yfir Gyðu í formi rafrænna skilaboða.
Ummæli Gyðu um Hugin voru öll dæmd dauð og ómerk enda hélt hún ekki uppi vörnum í málinu. Var hún dæmd til 250.000 króna sektargreiðslu. Huginn er mjög ósáttur við bótaupphæðina en hann krafðist 5 milljóna í skaðabætur, enda hafi árásir Gyðu á sig staðið yfir í langan tíma og skaðað mjög orðspor hans og vegið að æru hans og skaðað störf hans sem barnabókahöfundur og útgefanda.
Gyða segir í samtali við DV að hún hafi fengið tvö kröfubréf frá lögfræðingi Hugins þar sem henni var boðið að greiða fimm milljónir og þá myndi hann ekki fara í mál við hana. Stefnu vegna meiðyrðamálsins hafi hún hins vegar aldrei fengið í hendur. Gyða telur að hún hafi vel getað stutt með rökum og gögnum ummælin sem hún var dæmd fyrir hefði hún vitað af réttarhöldunum enda þekki hún baksvið þeirra vel.
„Ég hef ekki einu sinni fengið þennan dóm í hendurnar,“ segir Gyða. Að sögn hennar er lögfræðingur kominn af stað í að vinna að endurupptöku málsins fyrir hana. Einnig segist hún hugleiða meiðyrðamál gegn Hugin vegna ummæla sem hann hafi látið falla gegn henni.