Fimmta dauðsfallið hérlendis vegna COVID-19 sjúkdómsins átti sér stað í dag: Sigurður Sverrisson andaðist á Landspítalanum í Fossvogi. Sigurður, sem var fæddur árið 1953, hafði barist við sjúkdóminn undanfarnar vikur. Hann var um tíma tekinn úr öndunarvél en versnaði síðan aftur.
Vefur Fréttablaðsins greindi fyrst fjölmiðla frá þessu en bróðir Sigurðar tilkynnti um lát hans á Facebook og vinir hans nokkrir hafa kvatt hann á samfélagsmiðlinum.
Meðal vina Sigurðar er Snorri G. Bergsson þýðandi og skákmaður og hann kveður vin sinn með þessum orðum:
Ég syrgi í dag vin minn, húmoristann, briddsarann og skákmanninn Sigurð Sverrisson sem lést í dag og hafði þá verið ekkill um skamma hríð en frú María lést fyrir tæpum mánuði. Ég heyrði í honum fyrir um tveimur vikum og þá var hann hress þó að hann væri í sóttkví vegna kórónuveirunnar, hló að aulabröndurum eins og venjulega. Síðan versnaði hann af veirunni og var fluttur á sjúkrahús, þar sem hann lést af völdum hennar. Hvíl í friði gamli vinur og frú þín góð. RIP. YNWA
Bróðir Sigurðar tilkynnti um andlát hans á Facebook með þessum orðum:
„Það er með mikilli sorg í hjarta sem við í dag kveðjum ástkæran bróður. Það gerist núna svo skömmu eftir að við kvöddum okkar elsku mágkonu. Betri vini og félaga hef ég ekki getað hugsað mér. Megið þið hvíla í friði elsku Siggi bróðir og Mary Pat. Ykkar verður sárt saknað.“
Sú Mary Pat sem bróðir Sigurðar vísar til er eiginkona Sigurðar sem lést í síðasta mánuði.
DV vottar aðstandendum og vinum Sigurðar innilega samúð.