Á blaðamannafundi almannavarnarteymis ríkislögreglustjóra rétt í þessu tilkynnti Páll Matthíasson, forstjóri Landspítalans, að fyrsti sjúklingurinn með COVID-19 sem þurft hefur aðstoð öndunarvélar hefur útskrifast úr öndunarvél og er kominn af gjörgæslunni.

„Þetta eru gleðifréttir,“ sagði Páll, ekki bara fyrir sjúklinginn og aðstandendur hans heldur líka fyrir starfsfólk gjörgsælunnar og spítalans.

Á fundinum kom einnig fram að aðeins 45 hafi greinst með veiruna síðasta sólarhring. Flestir þeirra voru þegar í sóttkví sem bendir til þess að árangur aðgerða til að hamla smiti séu að bera árangur.

Spáð er að faraldurinn nái hámarki á næstu viku eða vikum og fjöldi innlagninga á gjörgæslu fylgir verstu spám. Páll segir að spítalinn sé að reikna með þeirri þróun og sé tilbúinn undir það og jafnvel enn verri stöðu.