Í þættinum í gær var tekið viðtal við Þórólf Guðnason sóttvarnalækni en svo virðist sem aðgerðir Íslands vekji athygli utan úr heimi. Fréttamaður þáttarins talar um að Ísland sé framarlega í heiminum í baráttunni og nefnir að Ísland sé búið að skima mest allra þjóða miðað við höfðatölu.
Þórólfur sagði í samtali við fréttamann NBC News NOW að árangurinn hér megi rekja til þess að hér séu gríðarlega margir skimaðir. „Við setjum þá sem greinast með veiruna í einangrun. Síðan erum við dugleg að rekja smitin og setjum alla í sóttkví sem hafa umgengist þá sem smitaðir eru,“ sagði Þórólfur. „Það er áhugavert að sjá að yfir helmingur þeirra sem eru með veiruna voru í sóttkví þegar þeir greindust. Það þýðir að aðgerðirnar okkar til að minnka umsvif veirunnar eru að virka.“
Talað var við Ölmu Möller, landlækni. „Það er engin leið sem er best í þessu en við erum að nota vísindi og bestu gögnin sem til eru á hverri stundu. Við erum að spá fyrir um hvað er líklegt en einnig skoðum við svartsýnustu spár,“ sagði Alma.
Þá var rætt við Gest Pálmason í þættinum en hann er meðal þeirra lögreglumanna sem hefur undanfarið unnið við það að rekja smitin hér á landi. „Herja einustu sekúndu er einhver að smitast og augljóslega viljum við að eins fáir smitist og hægt er. Það þýðir að við þurfum að ná í alla sem hafa umgengist smitaða einstaklinga og koma í veg fyrir að þeir smiti aðra,“ sagði Gestur.
Einnig mátti sjá Kára Stefánsson, forstjóra Íslenskrar erfðagreiningar, í þættinum en rætt var við hann um störf Íslenskrar erfðagreiningar í faraldrinum. Fréttamaður þáttarins sagði að vinnan sem fram fer þar gegni lykilhlutverki í baráttunni.
Hægt er að sjá brotið úr þættinum hér fyrir neðan: