Ásgerður Jóna Flosadóttir, formaður Fjölskylduhjálparinnar, segir fólk sem ekki gat fengið aðstoð hjá félaginu í síðustu viku hreyta í sig ónotum og illmælgi vegna þess að félagið hefur ekki tök á að keyra út matarsendingar í þessari viku eins og í síðustu viku. Segir Ásgerður að þessu fólki líði illa en ummæli þess særi hana djúpt. Þetta kemur fram í nýrri Facebook-færslu Ásgerðar sem er eftirfarandi:
Mikið hryggir það þegar fólk sem ekki fékk mataraðstoð hjá Fjölskylduhjálp Íslands í síðustu viku þegar við sendum mat til 570 heimila á höfuðborgarsvæðinu hreytir í mann ónotum og illmælgi þar sem við erum ekki með aðstoð í þessari viku. Þessu fólki líður mjög illa en þetta særir djúpt og það er vont. Nú verðum við að safna til a geta keypt matvæli en fólk virðist ekki vita að Borgin styður okkur um 42.600 á mánuði og Ríkið styður um 100.000 á mánuði. Þessir styrkir duga fyrir rafmagni, hita og síma á mánuði. En í guðana bænum, við reynum að gera okkar besta. Fjölskylduhjálp Íslands er ekki rekin af hinu opinbera svo það sé sagt. Verum góð við hvert annað.