Landsmenn voru fljótir að bruna í verslanir í gær eftir fréttir um samkomubannið. Hillur verslana tæmdust og héldu jafnvel einhverjir að vöruskortur væri í landinu. Ef marka má tilkynningu frá Krónunni þá er ekki fyrirsjáanlegt að neinn vöruskortur verði í verslunum þeirra. Fréttablaðið greindi frá.
Í tilkynningunni frá verslunarkeðjunni kemur fram að 60-70 prósent af vöruframboðinu í Krónunni sé íslensk framleiðsla og ekki er búið að stöðva framleiðslu. Þar að auki hefur Krónan ekki fengið neinar tilkynningar frá erlendum birgjum um stöðvun framleiðslu.
Hillurnar voru tómar í gær vegna álags á verslununum en starfsmenn hafa ekki náð að fylla nógu hratt á hillurnar. Hver búð fær þó sendingar daglega og fyllt er á hillurar fyrir opnun.
Einnig kemur fram í tilkynningunni að á hefðbundnum degi séu sjaldan fleiri en 100 í verslunum Krónunnar á sama tíma nema í stærri verslununum á álagstímunum milli 16 og 19. Krónan beinir því til viðskiptavina sinna að koma utan álagstíma ef það er hægt.
Vegna samkomubannsins munu starfsmenn Krónunnar telja viðskiptavini inn og út úr versluninni frá og með mánudeginum. „Við bregðumst að sjálfsögðu við og fylgjum öllum tilmælum,“ segir Hjördís Erla Ásgeirsdóttir, markaðsstjóri Krónunnar. „Mikilvægt er að undirstrika að nóg er til af vörum, vöruhús Krónunnar er fullt af vörum og því mun ekki verða neinn vöruskortur hjá okkur. Það er því engin þörf á því að hamstra vörur. Eðlilegt er að fólk sé áhyggjufullt því þetta eru fordæmalausir tímar, en við erum vel undirbúin og enginn þarf að óttast vöruskort hjá okkur. Við höfum undirbúið okkur vel undanfarnar vikur og fylgjumst jafnframt vel með. Við munum hafa að leiðarljósi að gæta þess að þetta hafi sem minnst áhrif á viðskiptavini okkar.“
