Rúta með 23 einstaklingum um borð valt á Mosfellsheiði, skammt vestan Grafningsvegar efri, í morgun. Tilkynning um slysið barst neyðarlínu klukkan 10:33 í morgun. Viðbragðsaðilar á vestanverðu Suðurlandi voru þegar sendir á vettvang og eru þeir nú við störf á vettvangi slyssins.

Í tilkynningu sem lögreglan á Suðurlandi birti á Facebook-síðu sinni nú á tólfta tímanum kemur fram að fljótlega hafi legið fyrir upplýsingar um að allir væru uppistandandi og ekki um alvarlegt slys að ræða.

„Engu að síður var viðbragði haldið enda kalt á vettvangi og nauðsynlegt að koma fólki í skjól. Það verður flutt í þjónustumiðstöðina á Þingvöllum en rekstraraðili rútunnar er að senda annan bíl eftir þeim sem ekki verða fluttir með sjúkrabíl til skoðunar. Ekki liggja fyrir upplýsingar um þjoðerni fólks eða ferðalag þeirra,“ segir í tilkynningu lögreglu.