Karl Steinar Valsson, yfirlögregluþjónn hjá rannsóknardeild lögreglunnar á höfuðborgarsvæðinu, staðfesti að máli væri unnið með hollenskum yfirvöldum í samtali við Vísi í dag.
Eins og áður segir þá herma heimildir DV að maðurinn hafi verið frelsissviptur. Samkvæmt heimildum DV var maðurinn píndur til að fara í apótekið vopnaður byssu. Heimildir Vísis herma að maðurinn hafi lagt byssuna á borðið og óskað eftir hjálp. Sagt er að maðurinn hafi verið þvingaður til þess að ræna apótekið vegna fíkniefnaskuldar. Þá er hann sagður hafa óskað eftir því að lögregla yrði kölluð á svæðið.
DV hafði samband við fjölskyldu mannsins í gær sem varðist allra fregna af honum.
Karl Steinar sagði í samtali við Vísi að lögreglan í Hollanddi væri að rannsaka atburðarrásina. Íslendingurinn er enn í haldi lögreglu en ekki er vitað hvort fleiri hafi verið handteknir í tengslum við málið.
Þá segir Karl að málavextir séu óljósir og til rannsóknar hjá hollensku lögreglunni þar sem maðurinn lagði vopnið á borðið. Auk þess segir hann að Íslenska lögreglan muni liðsinna hollensku lögreglunni í rannsókn á málinu.