Lögreglan á höfuðborgarsvæðinu handtók ungan mann fyrir utan hús þar sem skólaball var haldið. Tilkynning um málið barst rétt eftir klukkan eitt í nótt en í henni var hann sagður hafa handleikið hlut sem talinn var vera byssa.

Maðurinn, sem er 17 ára, var farþegi í bifreið sem lagt var í bílastæði fyrir utan ballið. Ungi maðurinn var handtekinn, að sögn lögreglu, en ætluð byssa fannst ekki. Hann er sagður hafa haft í hótunum við lögreglu og var hann færður á lögreglustöð þar sem foreldri kom og sótti unga manninn. Á lögreglustöðinni var rætt við hann að viðstöddu foreldri og viðurkenndi pilturinn þá að hafa verið að fíflast með loftbyssu og byssan ætti að vera í bifreiðinni. Að sögn lögreglu verður málið tilkynnt til Barnaverndar.

Nóttin var að öðru leyti tiltölulega róleg í umdæmi lögreglunnar á höfuðborgarsvæðinu. Fjórir voru stöðvaðir fyrir ölvunar- eða fíkniefnaakstur og þá var tilkynnt um eitt innbrot í skóla í Háaleitis- og Bústaðahverfi.