Pétur Hrafn Friðriksson heldur því fram á Twitter í gærkvöld að MR hafi fengið hjálp frá þjálfara sínum í keppni gærkvöldsins í Gettu betur sem sýnd var á RÚV. Hafi MR breytt svari sínu eftir að þjálfari liðsins leiðrétti keppendurna frá fremsta bekk í salnum. Pétur skrifar:
„Áhugavert atvik í Gettu betur keppni kvöldsins þar sem MR hafði breytt rangt svar í fyrri vísbendingaspurningu kvöldsins en eftir að hafa heyrt „nei“ úr salnum frá þjálfara sínum breyttu þau aftur í rétt svar. Afar furðulegt að þjálfarar liðanna skuli sitja á fremsta bekk.“
Athyglisvert er að Fjóla Ósk sem sigraði í þessari keppni með Kvennaskólanum í fyrra endurtístir þessum orðum Pétur Hrafns og tekur þar með undir þau. Bætir Fjóla raunar um betur í svari til Péturs og segir að klárlega ætti að endurskoða úrslitin. MR lagði Kvennó naumlega að velli í keppninni í gærkvöld, með aðeins eins stigs mun.
Myndband af atvikinu má sjá hér að neðan. Sumir áhorfendur telja sig heyra „nei“ úr salnum á 13-14 sekúndu. Myndbandið leiðir ekki í ljós úr hvaða barka það kemur.
[videopress bSngRyJP]