Öllum starfsmönnum sambýlis eins á höfuðborgarsvæðinu var ráðlagt að hringja í 112 til þess að fá skutl í vinnu vegna óveðursins sem nú geisar. Frá þessu greinir Fréttablaðið. Færsla um þetta birtist fyrst á Twitter í morgun en hefur nú verið eytt.
„Það er spáð brjáluðu veðri í fyrramálið, það er rauð viðvörun sem hefur ekki verið gefin út áður. Þeir sem eiga að mæta á vakt kl. 8 og líst ekkert á blikuna með veðrið og að koma sér sjálfir í vinnuna þurfa að vakna snemma og panta skutl í vinnuna frá björgunarsveit. Hringið um hálfsjöleytið í 112 og pantið skutl. Hver hringir fyrir sig,“ Þessi skilaboð eru sögð hafa verið send á Facebook–grúbbu starfsmannana.
Allir starfsmenn sambýlisins eru sagðir hafa fengið skilaboðin, þar með taldir starfsmenn sem sjá um ræstitækni og störf önnur sem tengjast ekki umönnun.
Samkvæmt Davíð Má Bjarnasyni, upplýsingafulltrúa Slysavarnafélagsins Landsbjargar, þá hafa björgunarsveitirnar tekið að sér að koma heilbrigðisstarfsmönnum til vinnu vegna veðursins, en þó ekki á höfuðborgarsvæðinu.
„Hluti af undirbúningnum fyrir óveðrið var að tryggja að heilbrigðisstarfsfólk komist til og frá vinnu og björgunarsveitir hafa komið að því að einhverju leyti. Þetta snýst um að halda innviðum í landinu gangandi en við erum langt í frá að vera að bjóða upp á slíka þjónustu,“ segir hann.