Tveir Íslendingar, kona á sjötugsaldri og karl á sextugsaldri, eru sögð hafa verið sett í einangrun síðdegis í dag á sjúkrahúsi í Torrevieja vegna gruns um að þau séu með kóróna-veiruna.

Frá þessu er greint á vef Cadena Ser á Spáni.

Konan leitaði fyrst til læknis eftir að hafa verið með hita og hósta. Þar kom í ljós að fólkið hafði áður verið í Kína, nánar tiltekið í borginni Whuan, þar sem faraldurinn nú er talinn eiga rætur sínar. Fullyrt er í fréttinni að um Íslendinga sé að ræða.

Parið er nú sagt dvelja á sjúkrahúsi í Torrevieja þar sem þau eru sögð í einangrun. Í fréttinni er tekið fram að aðeins konan sé veik, en ekki hefur verið staðfest að um kóróna-veiruna sé að ræða. Heilbrigðisyfirvöld víða um heim eru þó á varðbergi vegna þess að veiran getur verið mjög skæð. Nú þegar hafa tugir látist í Kína af völdum veirunnar.

Í frétt Cadena Ser kemur fram að sýni hafi verið send til Carlos III-stofnunarinnar í Madrid þar sem úr því verður skorið hvort um veiruna sé að ræða.