„Ég er mjög slegin en við klárum þetta. Þetta er staðan, hann verður ákærður fyrir manndráp af ásetningi. Það var vonast eftir að ákæran myndi hljóða upp á manndráp af gáleysi en þetta er staðan og við því er ekkert að segja. Svo eru réttarhöldin þann 23. mars. Við tökum þessu af æðruleysi,“ segir Heiða Þórðardóttir, systir bræðranna Gunnars Jóhanns Gunnarssonar og Gísla Þórs Þórarinssonar heitins.
Gunnar varð Gísla að bana þann 27. apríl 2019 í smábænum Mehamn í Finnmörku í Norður-Noregi. Réttarhöldum hefur verið frestað ítrekað þar sem saksóknari gat ekki komið sér niður á efni ákæru. Heiða, sem var í nánu sambandi við báða bræðurna, hefur áður fullyrt í viðtölum við DV að hún telji að þetta hafi verið slys. Á sama máli er lögfræðingur Gunnars. Mbl.is greindi frá málinu í gærkvöld og þar segir verjandi Gunnars, Bjørn Gulstad: „Það kemur mjög flatt upp á mig að ákært sé fyrir manndráp af ásetningi og ekki síður að lesa þann grundvöll sem héraðssaksóknari setur fram með því ákæruatriði.“ Hann segir jafnframt að fyrsta skotið hafi hlaupið úr byssunni áður en átök bræðranna um vopnið hófust. „Gísli Þór hafi þá gripið til vopnsins og Gunnar þá tekið viðbragð og skotið hálfbróður sinn í lærið í ógáti. Síðara skotið hafi svo hlaupið af við sjálf átök hálfbræðranna sem þá hófust og hafnað í vegg á heimilinu og því sé það fullkomlega órökrétt af hálfu ákæruvaldsins að ákæra fyrir manndráp af ásetningi þegar augljóst sé að um manndráp af gáleysi hafi verið að ræða, svo sem Gunnar hafi haldið fast við í öllum sínum framburði hingað til,“ segir í frétt mbl.is.
Heiða hefur ekki heyrt í Gunnari eftir birtingu ákærunnar en telur fullvíst að hún leggist mjög illa í hann. „Miðað við þau sönnunargögn sem lögmaður hans hefur undir höndum þá hefði ég talið öll efni til að ákæra fyrir manndráp af gáleysi. En svona er þetta og við mætum þessu af æðruleysi,“ segir Heiða sem verður viðstödd réttarhöldin 23. mars.
Heiða stígur fram með nýjar upplýsingar um harmleikinn í Mehamn
