Ástand tveggja ungra manna af þremur sem féllu í sjóinn með bíl sem fór fram af Óseyrarbryggju í Hafnarfirði í gærkvöld er alvarlegt.

Þetta kemur fram í tilkynningu frá Lögreglunni á höfuðborgarsvæðinu. Þrír piltar voru í bílnum. Þeir voru allir fluttir á slysadeild til aðhlynningar, en tveir piltanna síðan færðir á gjörgæsludeild Landspítalans og er ástand þeirra alvarlegt. Þriðji pilturinn var lagður inn á aðra deild spítalans og er líðan hans eftir atvikum.

Að sögn lögreglunnar er ekki hægt að veita upplýsingar um málið að svo stöddu.

Myndir af vettvangi má sjá á vefnum Hafnfirðingur.