Réttarhöldum yfir Gunnari Jóhanni Gunnarssyni sem varð bróður sínum Gísla Þór Þórarinssyni, að bana, þann 27. apríl, í smábænum Mehamn í Finnmörku í Norður-Noregi, hefur verið frestað til 23. mars. Verður þá liðið tæpt ár frá atburðinum.
Gunnar Jóhann viðurkennir að hafa orðið bróður sínum að bana en segir að það hafi verið slys og alls ekki ásetningur að baki því að skot úr byssu hans fór í læri Gísla sem blæddi út. Undir þetta hefur Heiða Þórðardóttir, hálfsystir bræðranna, tekið en hún var í nánum samskiptum og vinfengi við þá báða. Heiða ræddi málið í viðtali við DV í vor sem vakti mikla athygli: Heiða stígur fram með nýjar upplýsingar um harmleikinn í Mehamn
Enn hefur ekki verið gefin út ákæra á Gunnar þar sem ákæruvaldið hefur ekki getað gert upp við sig hvort hann verður ákærður fyrir morð eða manndráp af gáleysi. Er það ástæða frestunar réttarhaldanna en þau áttu upphaflega að fara fram 2. desember. „Miðað við sönnunargögn ætti það að vera manndráp af gáleysi og ég bið guð á himnum fyrir því að sá kostur verði valinn,“ segir Heiða í nýju viðtali við DV um málið. Það er Gunnari í óhag að hann mætti vopnaður heim til bróður síns en það mælir líka gegn ásetningi að skotið fór í læri Gísla, sem og ummæli Gunnars og systur hans um atburðinn.
Eins og nærri má geta hafa erfiðir tímar verið í fjölskyldu bræðranna og mikið ósætti, en margir í fjölskyldunni hafa tjáð mikinn fjandskap í garð Gunnars, sem og í garð Heiðu fyrir að tala máli hans. Ef marka má orð Heiðu hefur ástandið á Gunnari lagast mikið þann tíma sem hann hefur verið í varðhaldi og hefur hann gert sitt besta til að byggja sig upp.
„Fyrstu vikurnar voru Gunna afskapalega erfiður tími. Martraðir um atburðinn, gríðarlegt samviskubit og söknuður. Og svo sjálfsásakanir eins og gefur að skilja. Það liðu nokkrar vikur þar til hann treysti sér til að hafa samband við mig. Þegar hann hringdi þá grétum við bæði en sögðum fátt,“ segir Heiða.
„Þetta er sárara en tárum taki, hugsaðu þér pabba hans, börnin hans og alla þá sem elska þennan dreng! Ég fæ sting í hjartað. Hann hafði samband við mig um jólin. Hann hafði óvænt fengið tvær jólagjafir frá börnunum sínum í Noregi, 3 og 4 ára, en fyrir á hann dreng með yndislegri konu, sá mun fermast á þessu ári. Hann grét og sagði þetta hafa verið toppinn á tilverunni fyrir sig þessi jól en hann saknar þeirra sárt sem og drengsins hér heima á Íslandi,“ segir Heiða.
Heiða segir að Gunnar sé í góðu formi, líkamlega og andlega, hann hafi hætt áfengisneyslu og byrjað að rækta sjálfan sig. „Hann hefur notað tímann sinn vel eftir að hann náði að hvílast og dreifa huganum, en hann hugsar og talar fallega um alla, líka þá sem hata hann. Þannig er Gunni. Hann tekur fulla ábyrgð á gjörðum sínum. Allar afleiðingar hafa orsök, eins og sannleikurinn mun leiða í ljós.“
Heiða segir að bróðir hennar reyni líka að láta gott af sér leiða auk þess að mennta sig: „Gunni tók meðal annars að sér fanga fyrir nokkru síðan sem var í yfirvigt, lagaði mataræðið hans og þjálfar hann, en hann er sjálfmenntaður í þeim fræðum. Sá gaur er búinn að missa 7 kíló á 4 – 5 vikum. Einnig er hann sestur á skólabekk aftur, en hann kláraði aldrei skyldunámið. Hann hyggst klára stúdentinn. Og nota þennan skelfilega atburð öðrum til góðs og víti til varnaðar. Hann les fagurbókmenntir og elskar bækurnar hennar Imbu ömmu, Ingbjargar Sigurðardóttur. Hann les heimspeki og biblíuna og allt það sem er gott fyrir sálina.
Hann er í góðu líkamlegu og andlegu jafnvægi í dag og talar af skynsemi og af mikilli hlýju. En það breytir þó ekki þeirri staðreynd að Gísli er farinn og við söknum hans sárt, við situm ein eftir. Það bregst ekki að hann grætur þegar talið berst að Gísla, börnunum hans, mömmu og pabba hans. Við náum þó alltaf að grínast líka og hlæja – brosa í gegnum tárin,“ segir Heiða að lokum en hún verður viðstödd réttarhöldin yfir bróður hennar í Noregi þann 23. mars.
