Eftirfarandi er stutt brot úr Völvuspá DV fyrir árið 2020. Greinar upp úr spánni má lesa með því að smella hér.

Morð á miðju ári

Völvan þagnar. Augun stækka og hún sýpur hveljur. Henni reynist erfitt að koma upp orði, í fyrsta sinn á fundi okkar.

„Á miðju ári verður framið morð sem er einstakt á Íslandi. Verður sami einstaklingur handtekinn fyrir morð á tveimur einstaklingum. Verða morðin einstaklega hrottaleg og vel undirbúin. Málið mun skekja samfélagið og fylla alla landsmenn óhug. Í framhaldi af því verður löggæslan tekin til gagngerrar endurskoðunar, fjölgað í lögreglunni bæði á höfuðborgarsvæðinu og úti á landi. Þetta verður nefnilega þannig glæpur að það hefði verið hægt að koma í veg fyrir hann. Netið og samfélagsmiðlar spila þar rullu og loksins verður tekið á netglæpum innan lögreglunnar, því miður aðeins of seint,“ segir hún.

„Fíkniefnamál verða fyrirferðarmikil á árinu mörg dauðsföll verða sem rekja má til neyslu og ofneyslu alls konar fíkniefna. Þar er þróunin hröð og að minnsta kosti tvö ný stórhættuleg efni verða mjög afdrifarík á þessu ári. Eldsvoðar verða tíðir og mikið eignatjón í mörgum tilvikum. Manntjón í því sambandi sé ég aðeins eitt, sem betur fer. Það tjón ber ekki að með saknæmum hætti.“

Völvuspána í heild sinni má lesa í Völvublaði DV.