Guðbjörn Guðbjörnsson, stjórnsýslufræðingur, yfirtollvörður, söngvari og fyrrverandi Sjálfstæðismaður, kallar eftir því að komu forseta Indlands til Íslands verði mótmælt. Shri Ram Nath Kovind, forseti Indlands, kom til landsins í morgun.
Guðbjörn skrifar pistil sem birtist á Viljanum og er ljóst að tilgangurinn er að benda á meintan tvískinnung í því að mótmæla komu Mike Pence, varaforseta Bandaríkjanna, til Íslands en ekki mótmæla komu Kovind.
„Staða samkynhneigðra er afar slæm í Indlandi eða með því versta sem gerist í öllum heiminum. Advania hlýtur að flagga regnbogafánunum núna í hálfa stöng og borgarstjórinn kemur auðvitað hjólandi auk þess sem Guðni verður áfram með perluband Krafts,“ skrifar Guðbjörn.
Hann gefur í skyn að Pence hafi einungis verið mótmælt vegna þess að mörgum Íslendingum sé illa við Bandaríkin. „Auðvitað hljóta þingmenn VG, Samfylkingarinnar, Pírata og Viðreisnar að mótmæla komu forsetans og það gera væntanlega Samtökin 78, félagið Ísland-Palestína, Solaris, Rauði krossinn og önnur góð og gild félög. Við vitum jú öll að hér á landi hefur aldrei verið um hreint og klárt Kanahatur að ræða, heldur verður eitt yfir alla þrjóta og dusilmenn að ganga, ekki satt?,“ spyr Guðbjörn.