Lögreglan á höfuðborgarsvæðinu fékk tilkynningu um skemmdarverk í Árbæ á tólfta tímanum í gærkvöldi. Þar var um að ræða einstakling sem gekk á milli bíla og skemmdi þá. Þetta var eitt af þeim fjölmörgu verkefnum sem lögregla fékk inn á borð til sín í gærkvöldi og í nótt.
Nokkuð var um mál tengd ölvun- og fíkniefnaneyslu ef marka má skeyti sem lögregla sendi fjölmiðlum í morgun. Þannig var óskað eftir aðstoð við Gistiskýlið á sjötta tímanum í gærkvöldi vegna ölvaðs manns sem lét ófriðlega, skömmu síðar var tilkynnt um ölvaðan mann sem svaf á gangi stigahúss í Hlíðunum. Rétt fyrir klukkan 19 í gærkvöldi var svo tilkynnt um mann sem svaf ölvunarsvefni á veitingastað í Háaleitis- og Bústaðahverfi. Nokkrir ökumenn voru þar að auki teknir úr umferð vegna gruns um akstur undir áhrifum fíkniefna.
Lögregla handtók svo þrjá einstaklinga í Hafnarfirði en mennirnir eru grunaðir um þjófnað á ökutæki og eignaspjöll. Einn af hinum handteknu er auk þess grunaður um akstur undir áhrifum fíkniefna. Þá var tilkynnt um eignaspjöll á bifreið í Mosfellsbæ á sjöunda tímum í gærkvöldi. Þar var búið að brjóta rúðu í bifreiðinni.
Loks var tilkynnt um tvo einstaklinga að reyna að brjótast inn í hús í Árbænum á tólfta tímanum í gærkvöldi. Mennirnir fóru á brott þegar þeir urðu varir við húsráðanda.