Bjarni Kristjánsson, fyrrverandi rektor Tækniskólans, er látinn, níræður að aldri. Þetta kemur fram í Morgunblaðinu í dag en Bjarni lést síðastliðinn föstudag, 6. september.
Bjarni varð rektor Tækniskólans árið 1966 en hóf störf þar sem kennari þegar skólinn var stofnaður árið 1964. Hann var rektor allt til ársins 1990 en hélt áfram að sinna kennslu í tæknigreinum í nokkur ár til viðbótar eftir að hann hætti sem rektor.
Bjarni var vélaverkfræðingur að mennt og starfaði sem verkfræðingur hjá Skeljungi og hjá flugher Bandaríkjanna á Keflavíkurflugvelli áður en hann fór yfir í Tækniskólann.
Í umfjöllun Morgunblaðsins í dag er bent á að Bjarni hafi verið mikill áhugamaður um veiði og var hann einn af stofnfélögum Ármanna, félags um stangveiði á flugu.
Bjarni kvæntist Snjólaugu Bruun árið 1953 og áttu þau sex börn saman. Afkomendur þeirra eru orðnir 34.