Óhugnanlegt atvik átti sér stað í Austurbæjarskóla í byrjun mánaðarins þegar karlmaður gekk inn í skólann á miðjum skóladegi, lokkaði stúlku í 5. bekk með sér upp á loft skólans, þuklaði á henni og hafði uppi kynferðislega tilburði. Maðurinn var handtekinn nokkru síðar og er rannsókn málsins á lokastigi.
Greint er frá málinu á forsíðu Morgunblaðsins í dag.
Móðir stúlkunnar, Ísöld Ingvarsdóttir, segist hafa fengið þær upplýsingar frá skólanum að maðurinn hafi verið á ferli í skólanum í meira en klukkustund umræddan dag. Starfsfólk hafi séð hann og spurt í hvaða erindagjörðum hann væri en þá hefði hann sagst vera að leita að frænda sínum.
Bent er á það í fréttinni að þetta hafi gerst í upphafi skólaárs þegar erilsamt er í skólanum og ný andlit á göngum hans. Maðurinn hafi komið að stúlkunni þegar hún reyndi að komast hjá því að fara út í frímínútur, boðið henni með sér og hún samþykkt það. „Hún vissi ekki betur en að þetta væri nýr starfsmaður skólans og var meira en til í að fara með honum,“ segir hún.
Þegar upp var komið þuklaði maðurinn á rassi og kynfærum stúlkunnar utan klæða. Stúlkunni tókst að flýja og ná sambandi við kennara en þegar hringt var á lögreglu lagði hann á flótta. Hann var handtekinn nokkrum dögum síðar, að því er fram kemur í frétt Morgunblaðsins.
Í fréttinni kemur fram að eftirlit við ganga skólans hafi verið endurskoðað og eru allir starfsmenn hans nú merktir.
Ísold, móðir stúlkunnar, segir að fyrstu dagarnir eftir atvikið hafi verið rosalega erfiðir. Dóttir hennar hafi fengið martraðir en verið létt þegar hún frétti að hann hefði verið handtekinn. Ísold segir að þetta hafi einnig haft mikil áhrif á hana sem móður.
„Ég held að ég hafi fengið einhvers konar áfall. Ég varð ofboðslega reið, eiginlega meira gagnvart skólanum en manninum, því ég lít á hann sem mann sem þarf verulega mikla hjálp. Ég varð reið við skólann því ég hélt að barnið mitt væri öruggt þar.“