Héraðsdómur Reykjavíkur hefur dæmt karlmann í fjögurra mánaða fangelsi fyrir hegningarlaga- og umferðarlagabrot.
Maðurinn var meðal annars dæmdur fyrir að hafa, þann 4. júní 2018, farið inn í íbúð vistmanns á dvalarheimilinu Skógarbæ í Breiðholti. Þar stal hann fimm armbandsúrum af gerðinni Armani og Rolex, skartgripum og veski sem innihélt meðal annars 40 til 50 þúsund krónur í reiðufé og tvö greiðslukort. Í kjölfarið stal hann 80 þúsund krónum úr hraðbanka í Smáranum í Kópavogi.
Stuttu síðar, eða þann 11. júní, fór maðurinn inn í ólæsta bifreið við bílastæði Krónunnar í Rofabæ. Þaðan stal hann veski sem innihélt meðal annars gjafakort og lyfseðla. Í nóvember 2018 stal hann svo ýmsu lauslegu úr bíl sem hann fór inn í við verslun Byko á Skemmuvegi.
Maðurinn var einnig dæmdur fyrir umferðalgabrot en hann var í tvígang í október 2018 staðinn að akstri undir áhrifum fíkniefna.
Maðurinn sótti ekki þing við þingfestingu málsins.
Maðurinn á nokkuð langan sakaferil að baki, meðal annars fyrir þjófnað. Fjögurra mánaða fangelsisdómurinn yfir manninum er skilorðsbundinn til tveggja ára. Þá var hann sviptur ökuréttindum í fjórtán mánuði og gert að greiða sakarkostnað málsins, rúmar 190 þúsund krónur.
