Fréttablaðið skýrir frá þessu í dag. Starfsemi Mann í vinnu ehf. hafði verið í sviðsljósinu eftir ítarlega umfjöllun um hana og meðferð hennar á starfsfólki í fréttaskýringaþáttunum Kveik og Kastljósi.
Fréttablaðið hefur eftir Jóhannesi að ásakanir sem voru settar fram um að Rúmenarnir hefðu verið grátt leiknir af starfsmannaleigunni hafi verið úr lausu lofti gripnar, það sýni öll gögn málsins.
„Þessi aftaka á fyrirtækinu í fjölmiðlum er sennilega einsdæmi hérlendis og því er það mat mitt og skjólstæðinga minna að það verði að fá úr því skorið hvort slík aðför líðist. Það er ljóst að öðru málinu verður vísað frá en við munum halda hinu til streitu.“
Er haft eftir Jóhannesi. Þar á hann við að dómari málsins krafðist 1,2 milljóna króna málskostnaðartryggingar fyrir hvort mál. Ákveðið hafi verið að leggja þá tryggingu fram í málinu gegn Maríu Lóu en ekki gegn Unni og verði því málið því vísað frá dómi á morgun. Hann sagði að ljóst sé að fjárhagsstaða Manna í vinnu ehf. hafi verið mjög slæm eftir að málið kom upp og hafi fótunum verið kippt undan rekstri fyrirtækisins.
„Það er að okkar mati brýnt réttlætismál að fá úr því skorið hvort svona aðför gegn fyrirtækjum líðist í íslensku samfélagi.“
Er haft eftir honum.
Jóhannes sendi fjölmörgum bréf og krafðist afsökunarbeiðni og miskabóta vegna meiðandi ummæla. Meðal þeirra sem fengu slík bréf voru Sólveig Anna Jónsdóttir, formaður Eflingar, Drífa Snædal, forseti ASÍ og Viðar Þorsteinsson, framkvæmdastjóri Eflingar. Auk þess var slíkt bréf sent til forsvarsmanna Sýnar hf. og Eiríks Jónssonar fjölmiðlamanns sem baðst afsökunar að sögn Jóhannesar og var sá eini sem það gerði.