Þeir eru sagðir hafa svipt frelsi manns aðfaranótt laugardagsins 1. júlí 2017 skammt frá Hverafold 5 í Reykjavík. Í kærunni stendur að Daníel og Albert hafi svipt frelsi mannsins í að minnsta kosti fjóra til sex klukkustundir með því að hafa veist að honum með ofbeldi og hótunum um ofbeldi.
Þá eru þeir einnig sagðir hafa neytt manninn upp í bifreið og ekið með hann um höfuðborgarsvæðið. Meðal annars var stöðvað við Rauðavatn, Rimahverfi í Grafarvogi og Suðurbæjarlaug í Hafnarfirði og að lokum var honum ekið heim.
Albert Þór er þá sagður hafa snúið hann niður, haldið honum, löðrungað hann og lamið hann með krepptum hnefa í andlit og höfuð. Þá er hann einnig sagður hafa sparkað í rass mannsins.
Í ákæru segir:
Ákærði Daníel Aron ógnaði honum með hamri og hótaði að brjóta á honum hausinn ef hann færi ekki inn í bifreiðina og eftir að inn í bifreiðina kom
Daníel Aron er sagður hafa ógnað manninum með hamri og hótað að brjóta á honum hausinn ef hann færi ekki inn í bifreiðina. Þegar inn í bifreiðina er komið er Daníel sagður hafa ekið bílnum á meðan Albert er sagður hafa löðrungað manninn ítrekað ásamt því að slá hann með krepptum hnefa í andlit og höfuð. Þá er Albert einnig sagður hafa rifið í hár mannsins og margsinnis tekið hann hálstaki og hótað að drepa hann.
Í kærunni kemur fram að vegna þessa hafi maðurinn hlotið nefbeinabrot, tvær kúlur í hnakka og þreifieymsli þar yfir og umhverfis. Hann var marinn og bólginn á neðri augnlokum og á augnsvæði beggja augna. Þá fékk hann einnig tárublæðingu í vinstra auga, þreifeymsli yfir báðum kinnbeinum, neðri kjálka og á neðri brún augnumgjarðar vinstra megin. Auk þess fékk maðurinn marbletti yfir viðbeini beggja vegna, yfirborðsáverka á hálsi og hruflsár á hægra hné.
Maðurinn krefst þess að Daníel og Albert greiði honum tvær og hálfa milljón í miskabætur auk vaxta.